ஓட்டிகளே படகோட்டிகளே

விடுதலைப் போராட்டத்தில் பொதுமக்களின் பங்களிப்பு அளப்பரியது. முழுநேரப் போராளிகளாயில்லாது ஆனால் அதற்கும் மேம்பட்ட செயற்பாடுகளைச் செய்தவர்கள் பலர். அவ்வகையில் தொடக்க காலத்தில் படகோட்டிகளாக இருந்தவர்களையும் குறிப்பிடலாம். புலிகளுக்கென்று தனியொரு கடற்பிரிவு உருவாகாத காலத்திலும், அப்படி உருவாகிய கடற்புறா என்ற அமைப்பு 'கடற்புலிகள்' என்ற அமைப்பாக வளர்ச்சியுறாத காலத்திலும் புலிகளுக்கு படகோட்டிய பொதுமக்கள் முக்கியமானவர்கள். பொதுவாக படகோட்டியை 'ஓட்டி' என்ற பெயராலேயே அழைப்பதுண்டு. தமிழக - ஈழக் கடற்பயணங்களுக்கும் ஆயுத வினியோகத்துக்கும் காயமடைந்தவர்களைப் பரிமாறுவதற்குமென்று கடலே அந்தநேரத்தில் போராட்டத்தின் அச்சாணியாக இருந்தது. கடலில் புலிகளுக்காகப் படகோட்டி கொல்லப்பட்ட ஓட்டிகள் பலருண்டு. அந்தப் படகோட்டிகள் நினைவாக எழுந்த பாடல். குரலுக்குரியவர் மாவீரன் மேஜர் சிட்டு. ஓட்டிகளே படகோட்டிகளே -எங்கள் உணர்வினுக்கே வழிகாட்டிகளே வானில் நிலாவரும் காலத்திலும் - கரும் மேகம் உலாவரும் நேரத்திலும் -குளிர் வாடையடிக்கின்ற காலத்திலும் -புயல் வந்து அழிக்கின்ற நேரத்திலும் படகோட்டிய ஓட்டிகளே -எமை ஏற்றிய ஏணிகளே... ஆயுதங்கள் கொண்டு தந்தீரே -ஏதும் ஆகாமல் கரை வந்தீரே - உயிர் போகாமல் எம்மை காத்தீரே -நாங்கள் போராட வலு சேர்த்தீரே படகோட்டிய ஓட்டிகளே -எமை ஏற்றிய ஏணிகளே... சாவுக்கு நீரஞ்சி நிற்காமல் -உங்கள் தாய்பிள்ளை தாரத்தை எண்ணாமல் -தமிழ் ஈழத்தின் விடிவிற்காய் வாழ்ந்தீரே -அலை ஏறும் கடல்மடி பாய்ந்தீரே படகோட்டிய ஓட்டிகளே -எமை ஏற்றிய ஏணிகளே...